«ҚР Президенті Кубогының» финалында Испания мен Әзірбайжан құрамасы ойнайды

Астанада VIII «ҚР Президенті Кубогы» халықаралық турнирі өтуде. 17 жасқа дейінгі футболшылар арасындағы жарысқа 8 құрама қатысуда. Испания құрамасы топтық кезеңнің соңғы ойынында Қырғыз Республикасының футболшыларын 7:0 есебімен ұтты. Осылайша турнир барысында 15 гол соғып, қақпасына бір де гол өткізбеген Испания құрамасы финалға шықты. Айта кетейік, олар алғашқы ойында Тәжікстан құрамасын 3:0, ал Қазақстан футболшыларын 5:0 есебімен жеңген. Енді 2015 жылғы «ҚР Президенті Кубогының» финалында Испания өз тобында бірінші орын алған Әзірбайжан футболшыларымен кездеседі. Ал, жарыстың қола жүлдесі үшін Грузия құрамасы мен Қазақстан-Тәжікстан жұбының жеңімпазы сарапқа салады. Еске сала кетейік, «KAZsport» телеарнасы футболдан «ҚР Президенті Кубогы» халықаралық турнирін тікелей эфирде көрсетуде. Фото: ҚФФ