Қазақстанға Париж қазақтарының «Paris Kazakspor» футболшылары келді

Астанаға Париж қазақтары ойнайтын «Paris Kazakspor» клубының футболшылары келді. Олар еліміздің төрт ірі қаласында қазақстандық футбол командаларымен жолдастық кездесу өткізбек. 9 маусымда «Paris Kazakspor» футбол клубының 14 ойыншысы Астанадағы Қ.Мұңайтпасов атындағы стадионда ойнамақ. Ал, 11 маусым күні Қарағанды қаласында «Шахтердің» қосалқы командасымен сайысқа түседі. Сонымен қатар, Франциядан келген қандастарымыз 15 маусымда Шымкент қаласына барып, «Ордабасының» қосалқы командсымен кездеспек. Ал, команданың 18 маусымда Алматыда ойнайтын қарсыласы әлі анықталмаған. Айта кетейік, 1986 жылы құрылған «Paris Kazakspor» футбол клубы бүгінде Франция футбол федерациясының 7-ші лигасында ойнайды. Қандастарымыз «Париж» және «Иль-де-Франс» кубоктарын жеңіп алған.