Қазақстан Ұлттық құрамасы Кабо-Вердемен жолдастық матч өткізеді

Қазақстан футбол федерациясының жетекшілігі 16 маусым күні Алматыда тағы бір жолдастық матч өткізу жөнінде алдын ала келісімге келді. Бұл матчта біздің футболшылардың қарсыласы Кабо-Верде құрамасы болмақ. Кабо-Верде футболшылары 31 наурыз күні Португалия құрамасын ұтты. Бүгінде Кабо-Верде құрамасы FIFA рейтингінде 37-ші орында тұр. «Қазіргі уақытта алдын ала келісім жасалды. Тек ресми жұмыстар қалды, бұл халықаралық матчты ұйымдастырудың шешуші бөлігі. Дегенмен, Қазақстан – Кабо-Верде кездесуі 16 маусым күні Алматының Орталық стадионында өтеді»- дейді Қазақстан футбол федерациясы халықаралық бөлімінің жетекшісі Тұлпар Мансұров. Еске сала кетейік, Алматыда Ұлттық құраманың екі матчы жоспарланған. 12 мамыр күні Қазақстан құрамасы Африканың вице-чемпионы Буркина-Фасомен жолдастық матч өткізеді. Ал, 12 маусым күні Еуро-2016 іріктеу турнирі аясында Түркия құрамасымен ойнайды, деп хабарлайды ҚФФ баспасөз қызметі .