Стивен Жеррард «Энфилд Роудта» қоштасу ойынын өткізді

«Ливерпуль» клубының аңыз ойыншылары Стивен Жеррард пен Жейми Каррагер клуб тарапынан ұйымдастырылған қоштасу кездесуін өткізді. Қоштасу матчына екі футболшы да «Ливерпуль» сапында доп тепкен футболшыларды өз құрамаларына шақырған. Стивен Жеррард өз командасына Тьерри Анри, Фернандо Торрес, Райан Бабел, Хаби Алонсо, Жон Терри секілді футбол жұлдыздарын шақырған. Ал, Жейми Каррагердің тізімінде Марио Балотелли, Дидье Дрогба, Гарри Кювелл, Альваро Арбелоа, Стюарт Даунинг сияқты футболшылар бар. Қоштасу кеші тең нәтижеде өтті. Оған 2:2 есебі дәлел. Каррагер командасынан Дидье Дрогба және Марио Балотелли гол салған болса, Стивен Жеррард екі рет 11 метрлік айып соққысын қатесіз орындап, өз клубын жеңілістен сақтап қалды. Айта кетейік, Стивен Жеррардтың «Ливерпуль» клубымен келісімшарты жазда аяқталады. Енді, 34-жатағы ағылшын футболшысы американың «Лос-Анджелес Гэлакси» клубы сапында доп тебетін болады.