Астанада жеңіл атлетикадан жабық кешендегі Әлем чемпионаты өтеді

Байрақты бәсекені өткізу шешімі World Athletics кеңесінің Торунь (Польша) қаласында өткен отырысында ресми хабарланды.

Әлем чемпионаты 2030 жылдың 15-17 наурыз аралығында елордада өтеді деп жоспарланған.

Сонымен бірге халықаралық федерация басқа да әлемдік жарыстардың өтетін орындарын жария етті. Атап айтқанда, 2028 жылғы жабық кешендегі әлем чемпионаты Одиша (Үндістан) өңірінде өтеді. Ал Хэфэй (ҚХР) қаласында сол жылы спорттық жүрістен командалық әлем біріншілігі өтпек.

Сондай-ақ, 2023 жылы Астанада жеңіл атлетикадан жабық кешендегі Азия чемпионаты ұйымдастырылған еді. Сонымен қатар елорда 2024 және 2025 жылдары World Indoor Tour Gold сериясының кезеңдерін қабылдады.