Алматыда үстел теннисінен 2026 жылы Әлем чемпионатына іріктеу турнирі өтеді

14 шілдеде Алматыда 2026 жылы Лондонда өтетін үстел теннисінен әлем чемпионатына Орталық Азия іріктеу турнирі өтеді. Аймақтан тек ерлер және әйелдер арасындағы ең үздік команда ғана Англия астанасына жолдама алады. Қазіргі таңда Қазақстан ұлттық құрамасы оқу-жаттығу жиынын өткізіп, жауапты додаға қарқынды дайындалып жатыр.

«Құраманың мүшелері мен үміткерлері турнирдің маңыздылығын жақсы түсінеді. Барлығы адал еңбек етіп, жаттығуда бар күш-жігерін салып жатыр. Әлем чемпионатына жолдама алуға деген құлшыныстары өте жоғары», – деп атап өтті Қазақстан құрамасының бас бапкері Эльмира Әлиева.