Қамшыбек Қоңқабаев - әлем чемпионатының күміс жүлдегері

Ресейдің Екатеринбург қаласында бокстан әлем біріншілігі өтті. Айтулы аламанға аттанған 8 қазақстандықтың 6-ы жүлдеге ілікті. Бекзат Нұрдәулетов әлемдік доданың алтынын иеленген соң, ендігі кезек команда капитаны Қамшыбекте еді.

Қазақ боксшысы осыған дейін кәсіпқой рингте 6 жекпе-жек өткізген Баходир Джалоловпен финалда кездесті. Ақтық сында отандасымыз жақсы жұдырықтасқанымен, төрешілер жеңісті өзбек боксшысына берді. Сөйтіп, Қамшыбек әлем чемпионатының күміс жүлдегері атанды. Сондай-ақ, Василий Левит, Абылайхан Жүсіпов, Сәкен Бибосынов, Тұрсынбай Құлахмет қоланы қанағат тұтты.