Жәнібек Әлімханұлы кәсіби бокста бағын сынап көрмек

29-шы қазан күні Алматыда қазақтың танымал кәсіпқой боксшысы Қанат Ислам кезекті жекпе-жегін өткізеді. Осы күні кәсіпқой рингтен Жәнібек Әлімxанұлын да көріп қалуымыз мүмкін. «Қанат Исламның Алматыда өтетін жекпе-жегін асыға күтіп жүрмін. Бұл күні мені де кәсіпқой рингтен көріп қалуларыңыз мүмкін. Алла сәтін салса, 29-шы қазанда кәсіпқой бокстан бағымды сынап көрсем деп жоспарлап жатырмын. Әзірге қарсыласым белгілі болған жоқ. Кім екенін нақты белгілі болғанда айта жатармын. Мен кіммен болса да, жұдырықтасуға дайынмын», - деп атап өтті Жәнібек Әлімханұлы. Естеріңізге сала кетейік, Рио Олимпиадасында Жәнібек Әлімханұлы 75 килограмм салмақта өнер көрсетіп, ширек финалда әзірбайжандық Камран Шахсуварлыға ұтылып қалған болатын.