Қазақстандық кәсіпқой боксшы Мадияр Әшкеевтің қарсыласы анықталды

Қазақстандық боксшы Мадияр Әшкеев (5-0, 3 KO) өзінің келесі кездесуін 24 қыркүйек күні АҚШ-тың Лос-Анджелес қаласында өткізеді (Астана уақытымен 25 қыркүйек). Отандасымыздың қарсыласы америкалық Мартез Джексон. Бұл туралы боксшының "вконтакте" желісіндегі ресми парақшасы хабарлады. Америкалық кәсіпқой боксшы Мартез Джексон АҚШ-тың оңтүстігіндегі Джорджия штатының Валдоста қаласында 1983 жылы дүниеге келген. Кәсіпқой бокстағы алғашқы кездесуін 2015 жылдың 30 мамырында өткізіп, тең түскен. Ол бүгінге дейін 5 жекпе-жек өткізіп үшеуінде жеңіске жетсе, екеуінде тең түскен. Соңғы кездесуін 2016 жылдың 29 шілдесінде өткізіп, қарсыласын техникалық нокаутпен ұтқан. Айта кетейік, Мадияр Әшкеев соңғы жекпе-жегін 18 тамыз күні америкалық боксшы Ленвод Дойзерге қарсы өткізіп, 4 раундта нокаутпен ұтқан болатын.