Златан Ибрагимович Головкин - Брук жекпе-жегінде отандасымызға жанкүйерлік етеді

«Манчестер Юнайтед» шабуылшылары Уэйн Руни мен Златан Ибрагимович Лондонда өтетін қазақстандық Геннадий Головкин мен британдық Келл Брук арасындағы жекпе-жек кешіне қонақ ретінде қатысады. Бұл туралы Бруктың промоутері Эдди Хирн хабарлады. «Сенбі күні «Халлды» жеңгеннен кейін Уэйн Руни маған қоңырау шалды. Ол Златанның Головкиннің үлкен жанкүйері екенін айтып, жекпе-жекке келуіме болады ма деп сұрады. Мен, әрине, «иә» деп жауап бердім. Бұл күні манчестерлік дерби өтеді, дегенмен олар жекпе-жекке үлгерулері керек», - деді Хирн. Айта кетейік, 10 қыркүйек күні Руни мен Ибрагимович «Манчестер Юнайтед» құрамасы сапында өз алаңында «Манчестер Ситимен» ойнайды. Бұл матч Астана уақытмымен 17:30-да басталады. Матчтан кейін футболшылар Головкин-Брук кездесуіне үлгеру үшін Лондонға дейінгі 335 шақырым қашықтықты автокөлікпен жүріп өтпек. Естеріңізге сала кетейік, Геннадий Головкин мен Келл Брук арасындағы жекпе-жек өтетін бокс кеші 10 қыркүйек күні, Астана уақыты бойынша сағат 00:00-де басталады. Аталған бокс кешін «Kazsport» «Қазақстан» телеарнасы тікелей эфирде көрсетеді.