Менің соққыларымның күші Головкиндікінен осал емес – Энди Ли

Орта салмақтағы (72,6 кг дейін) WBO нұсқасы бойынша Әлем чемпионы Энди Ли өзінің соққыларының күші Головкин соққысынан осал емес, деп санайды. Сондықтан да 2016 жылы онымен күш сынасуы мүмкін екенін айтты. Бұл туралы GGG-дің ВКонтакте желісіндегі ресми тобының парақшасында хабарлады. «Маған оның чемпиондық белдіктері ұнайды. Әдемі. Мен оның белдіктерін тартып алғым келеді. Ол да менікін алуға қарсы емес», - деді Энди Ли. «Мен онымен 18 жасымда бозбала кезімде әуесқой бокста кездескем. Бірақ ол кезде оның Әлем чемпионы екенін білмедім. Маған ол жекпе-жек өте қиын болды. Бірақ, уақыт өтті. 14 жыл артта қалды, екеуміз де есейдік. Головкин - мықты боксшы, ол өзінің қарсыластарының барлығын жеңді. Бірақ ол мен сияқтылармен әлі кездескен жоқ. Менің соққыларымның күші Головкин соққысынан осал емес. Ол мен сияқтылармен кездескен кезде не болатынын көреміз», - деді Ли. Айта кетейік, 19 желтоқсанда Манчестер қаласында (Англия) Энди Ли өзінің чемпиондық атағын сақтап қалу үшін Билли Джо Сондерспен (22-0, 12 KO) жекпе-жек өткізеді.