Бокстан ӘЧ. Жәнібек Әлімханұлы мен Василий Левит келесі кезеңге өтті

Дохада (Катар) бокстан Әлем чемпионатының 3-ші жарыс күні аяқталды. 75 келіге дейінгі салмақта бақ сынаған қазақстандық боксшы Жәнібек Әлімханұлы алғашқы жекпе-жегінде мексикалық Мисаэль Родригесті 3:0 есебімен ұтты. Енді бокстан 2013 жылғы Әлем чемпионы Жәнібек 1/4 финалда ирландиялық Майкл О'Рейлимен кездеседі. Бұл күні шаршы алаңға тағы бір қазақстандық спортшы Василий Левит (91 келі) шығуы тиіс еді. Алайда оның қарсыласы бразилиялық Жуан Гонсальвес Ногейра жекпе-жекке шықпады. Осылайша, Әлем чемпионатында әлі шаршы алаңға шықпаған Василий турнирдің ширек финалына жолдама алды. Айта кетейік, «KAZsport» телеарнасы бокстан Әлем чемпионатының барлық жекпе-жектерін тікелей эфирде көрсетіп жатыр. Ал, әлемдік доданың жартылай финалдық бәсекелерін «Қазақстан» Ұлттық телеарнасы жексенбі, 11 қазан күні Астана уақытымен сағат 22:35-те тікелей эфирде көрсетеді. Еске сала кетейік, 2016 жылғы Еуропа чемпионатының іріктеу турниріндегі Қазақстан - Нидерланд матчы 10 қазан күні «Астана Арена» өтеді. Матчтың басталу уақыты - 22:00.