Біржан Жақыпов Рио Олимпиадасының лицензиясын ұтып алды

Бокстан Қазақстан Ұлттық құрамасының мүшесі, 2013 жылғы Әлем чемпионы Біржан Жақыпов (49 келі) 2016 жылы Рио-де-Жанейрода өтетін Олимпиада ойындарына лицензия жеңіп алды. Қытайдың Гуйян қаласында «AIBA Pro Boxing» жобасы аясында олимпиадалық лицензия ойнатылды. Шешуші жекпе-жекте Біржан Жақыпов эквадорлық боксшы Карлос Эдуардо Куипо Пилатаксимен кездесіп, 2:0 (77:75, 76:76, 78:74) есебімен жеңіске жетті. Айта кетейік, «AIBA Pro Boxing» өткен маусымында Берік Әбдірахманов (60 келі) Рио-де-Жанейрода өтетін Олимпиадаға лицензия ұтып, чемпион атанған еді. Ал, ертең Миланда (Италия) «AIBA Pro Boxing» аясында қазақстандық Антон Пинчук (91 келі) италиялық боксшы Клементе Руссомен кездеседі.