WSB финалы. Василий Левит Эрисланди Савонға 1:2 есебімен есе жіберді

Астанада WSB (Бүкіләлемдік бокс сериясы) 5-ші маусымының «Astana-Arlans» пен «Cuba Domadores» арасындағы финалдың бірінші күні аяқталды. «Дәулет» спорт кешенінің шаршы алаңына соңғы болып 91 келіге дейін салмақ дәрежесіндегі боксшылар шықты. «Astana-Arlans» командасының мүшесі Василий Левит кубалық Эрисланди Савонға 1:2 (47:48, 47:48, 49:46) есебімен есе жіберді. Осылайша «Astana-Arlans» командасы финалдық серияда 3:2 есебімен алда келеді. Айта кетейік, алғашқы жұпта қазақстандық Теміртас Жүсіпов кубалық Йоанис Оскар Аргилагості 3:0 (50:45, 50:45, 50:45) есебімен ұтты. Екінші кездесуде Қайрат Ерәлиев кубалық 2012 жылғы Лондон Олимпиадасының чемпионы Робейси Рамиреске есе жіберді. Ал, «Astana-Arlans» командасының капитаны Самат Бәшенов Ясниер Толедоны ұтса, Мейірім Нұрсұлтанов Арлен Лопесті жеңді.