Головкин-Мюррей жекпе-жегін Қазақстан аумағында 1 миллионнан астам көрермен тамашалған

Орта салмақтағы WBA (Super), IBO мен WBC (Interim) тұжырымы бойынша Әлем чемпионы қазақстандық Геннадий Головкин мен ұлыбританиялық боксшы Мартин Мюррей арасындағы жекпе-жекті Қазақстан аумағында 1 миллион 360 мың адам тамашалаған. TNS Central Asia компаниясының зерттеуі бойынша 22 ақпанда таңғы сағат 05:00-де өткен Головкин-Мюррей жекпе-жегін «Қазақстан» Ұлттық телеарнасынан Қазақстанның жалпы телеаудиторияның 81 пайызы немесе 930 мыңға жуық адам тамашалаған. 22 ақпанда сағат 18:50-де «Қазақстан» Ұлттық телеарнасы жекпе-жектің қайталауын көрсетті. Осы уақытта көрсетілген кездесуді жалпы телеаудиторияның 19 пайызы, яғни 1 миллион 800 мың адам тамашалаған. «Қазақстан» РТРК» АҚ-ның медиа-сараптама бөлімінің басшысы Ербол Бегімбетовтің айтуынша, зерттеу нәтижесі бойынша Головкин-Мюррей жекпе-жегін 1 миллион 360 мың адам қараған. Сонымен қатар, жекпе-жектің Интернеттегі тікелей көрсетілімін «Қазақстан» Ұлттық телеарнасының ресми сайтынан 117 мың адам тамашалаған.