Мэнни Пакьяо мен Флойд Мэйвезер жекпе-жек өткізу туралы келісімшартқа қол қойды

Филиппиндік Мэнни Пакьяо мен америкалық Флойд Мэйвезер арасындағы бокс кеші 2 мамырда Лас-Вегаста өтеді. «Бүкіл әлем осыны асыға күтті. Міне бүгін олардың арманы орындалды. Келісімшартқа қол қойылды. Мен жанкүйерлерге берген сертімде тұрдым. Енді біз 2 мамырды тарихи күнге айналдырамыз», деді Флойд Мэйвэзер. 36 жастағы Мэнни Пакьяо – 66,68 келі салмақтағы WBO тұжырымы бойынша Әлем чемпионы. Кәсіпқой бокста 64 жекпе-жек өткізіп, 57 рет жеңіске (38 нокаут) жеткен. Пакьяо 5 рет жеңіліп, 2 кездесуде тең түскен. Ал, 37 жастағы Флойд Мэйвезер – 66,68 салмақтағы WBC, IBF және WBA тұжырымдары бойынша Әлем чемпионы. Ол кәсіпқой шаршы алаңда 47 жекпе-жек өткізіп, барлығында жеңіске (28 нокаут) жеткен. Пакьяо-Мэйвезер арасында жекпе-жек MGM Grand қонақ үйінде өтетіні белгілі болғаннан кейін қонақ үйдегі барлық бөлмелер 15 минутта сатылған.