Головкин-Мюррей жекпе-жегінің финалдық баспасөз мәслихаты өтті (ФОТО)

Монакода ұлыбританиялық Мартин Мюррей мен WBA (Super), IBO мен WBC (Interim) тұжырымы бойынша Әлем чемпионы қазақстандық Геннадий Головкиннің жекпе-жегі алдындағы финалдық баспасөз мәслихатты өтті. «Менің қарсыласым Мартин Мюррей – керемет боксшы әрі жақсы жігіт. Мен оны және командасын құрметтеймін. Мен оның мықты екенін көріп отырмын», - деді Геннадий Головкин. «Головкин – мықты боксшы. Бірақ мен оны жеңе алатын қарсыласпын», деп келтіреді Мюррейдің сөзін ВКонтакте желісіндегі «Геннадий GGG Головкин» тобы. Айта кетейік, Головкин мен Мюррейдің жекпе-жегі болатын бокс кеші 21 ақпанда (21-ші ақпаннан 22-ші ақпанға қараған түні) Астана уақыты бойынша сағат 01:25-те басталады. Бокс кешін «Қазақстан» Ұлттық телеарнасы тікелей эфирде көрсетеді. Ойын барысын ел аумағында онлайн трансляциялау құқығы kaztrk.kz порталына берілген. Ал, жекпе-жектің қайталауын 22 ақпанда «KAZsport» телеарнасынан тамашалай аласыздар. Фото: ВКонтакте желісіндегі «Геннадий GGG Головкин» тобы