Бокстан Қазақстан қыздар құрамасы оқу-жаттығу жиынын Әзірбайжан командасымен бірге өткізеді

Сербияда өткен Ұлттар Кубогында Суперкубокты жеңіп алған бокстан Қазақстан қыздар құрамасы Алматы облысында Әзірбайжан командасымен бірге оқу-жаттығу жиынын өткізеді, деп хабарлайды Қазақстан Бокс федерациясының баспасөз қызметі. Қазіргі таңда қыздар құрамасы мамыр айында өтетін Азия чемпионатына дайындалуда. Осы сайысқа дайындалуға бағытталған оқу-жатығу жиыны 14-ақпанға дейін жалғасады. «Азия чемпионатындағы басты қарсыластар – Қытай, Оңтүстік Корея, Үндістан командалары. Қазақстанның атынан біздің бірінші нөмірлі боксшылар Назым Қызайбай, Ләззат Күнгейбаева, Дариға Шәкімова, Дина Жоламан, Зарина Цолоева сынға түседі», - дейді бапкер Қайрат Манашев Биыл Азия чемпионатымен қатар, қыздар Польша, Қырғыз Республикасы, Болгария және Ресей елдерінде өтетін бірнеше турнирлерге қатысады. Алайда, боксшы қыздардың алдында тұрған басты мақсат – келер жылы Астанада өтетін Әлем чемпионатына тыңғылықты дайындалу. Фото: kfb.kz