Chemistry Cup 2014. Әбдірахманов пен Ниязымбетов алғашқы жекпе-жектерін жеңіспен аяқтады

Германияның Галле қаласында Chemistry Cup 2014 турнирінің алғашқы жекпе-жектері өтті.

Өкінішке қарай, жарыстың бірінші күні 75 келі салмақта Рүстем Сыбаев сүрінді.  Ол шаршы алаң иесі Хек Паскалиге 1:2 есебімен есе жіберді.

Дегенмен Берік Әбдірахманов (60 келі) пен  Әділбек Ниязымбетов (81 келі) алғашқы жекпе-жектерін жеңіспен аяқтады. Берік Әбдірахманов германиялық боксшы Адтке Гашиді 2:1 есебімен ұтса, Әділбек Ниязымбетов даниялық боксшы Раджаб Сарвариді мерзімінен бұрын жеңді.

Бүгін Теміртас Жүсіпов (49 келі) алғашқы жекпе-жегін өткізеді. Оның қарсыласы – ирландиялық боксшы Кише Майерс. Сондай-ақ, 64 келіде Алмасбек Әлібеков  молдовалық боксшы Дмитрий Галаготпен жұдырықтасады.