Бейбіт Шүменов пен Бернард Хопкинс жекпе-жегінің төрешілері анықталды

Кәсіпқой бокстан WBA тұжырымы бойынша әлемнің суперчемпионы Бейбіт Шүменов (14-1, 9 КО) пен IBF тұжырымы бойынша Әлем чемпионы Бернард Хопкинс (54-6-2, 32 КО) жекпе-жегінде қызмет ететін төрешілердің есімдері белгілі болды. Шаршы алаңдағы міндет Эрл Браунға жүктеліп отыр. Ол 2013 жылдың наурызында Бернард Хопкинс пен Тэворис Клауд арасындағы жекпе-жекте төрешілік еткен. Сол кезде Шүменовтің қазіргі қарсыласы ұпай санымен жеңіске жетіп, бокс тарихындағы ең жасы үлкен чемпион атанды. Жекпе-жектің төрешілері - Густаво Падийя (Панама), Дэйв Моретти (АҚШ) және Джерри Рот (АҚШ). Ал кештің супервайзер қызметіне Жильберто Жезус Мендоза тағайындалды, деп хабарлайды BoxingScene.com. Естеріңізге сала кетейік, қазақстандық пен америкалық боксшы арасындағы жекпе-жек 19 сәуірден 20 сәуірге қараған түні Вашингтонда өтеді. Бокс кешін «KAZsport» телеарнасы тікелей эфирде көрсетеді.