Шүменов – Хопкинс жекпе-жегін «KAZsport» тікелей эфирде көрсетеді

Сенбі, 19 сәуірден 20 сәуірге қараған түні Вашингтонда бокс кеші өтеді. Бұл кештің басты жекпе-жегінде жартылай ауыр салмақта (79,4 келі) WBA тұжырымы бойынша Әлем чемпионы, қазақстандық Бейбіт Шүменов пен WBC, WBA, WBO, IBO тұжырымы бойынша әлемнің экс-чемпионы, IBF тұжырымы бойынша Әлем чемпионы, америкалық Бернард Хопкинспен жұдырықтасады. Бокс кешін «KAZsport» телеарнасынан тікелей эфирде көруге болады. Трансляция Астана уақыты бойынша түнгі сағат 03.00-де басталады. Ал жексенбі күні, 12.10-да «Қазақстан» Ұлттық телеарнасы қайталайды. Бейбіт Шүменов кәсіпқой бокста 15 жекпе-жек өткізіп, оның 9-да қарсыласын нокаутқа жіберген. Ал оның қарсыласы Бернард Хопкинс шаршы алаңға 64 рет шығып, 32 рет жекпе-жекті мерзімінен бұрын аяқтаған. 49 жастағы америкалық кәсіпқой бокстағы алғашқы жекпе-жегін 1988 жылы өткізген. Ол кезде Бейбіт небәрі бес жаста болған. Естеріңізге сала кетейік, Бейбіт Шүменов өткен жылдың аяғында словак Тамаш Ковачпен кездесіп, чемпиондық атағын қорғап қалған еді. АҚШ-тың Сан-Антонион қаласында өткен жекпе-жекте қазақстандық боксшы қарсыласын үшінші раундта нокаутқа жіберді.