«Team Germany» - «Астана арландары» 2:3

Дүниежүзілік бокс сериясының ширек финалындағы «Team Germany» мен «Астана арландары» кездесуінің соңғы жекпе-жегінде 91 келі салмақтағы боксшылары шаршы алаңға шықты. Бұл жекпе-жекте Василий Левитке германиялық Артур Манн қарсылас атанды. Манн топтық кезеңде екі рет жекпе-жек өткізіп, біреуінде ғана жеңіске жеткен. Ал әлемдік рейтингте екінші орында тұрған Василий Левит топтық бәсекеде өткізген төрт жекпе-жектің барлығын жеңіспен аяқтаған. Бұл жолы да қазақстандық боксшы жекпе-жекті өз пайдасына шешілді. Василий Левит кезекті жеңісіне қол жеткізіп қоймай, ширек финалдың алғашқы кездесуінде «Астана арландарына» жеңіс әкелді. Қорытынды есеп: «Team Germany» мен «Астана арландары» 2:3. Бұған дейін Мейірболат Тойытов пен Асхат Уәлиханов қарсыластарына есе жібергенімен, Теміртас Жүсіпов пен Сергей Деревянченко өз жекпе-жектерін жеңіспен аяқтады. «Team Germany» мен «Астана арландары» арасындағы қарымта кездесу 5 сәуірде Алматыда өтеді. Бұл кездесуде шаршы алаңда «Астана арландары» сапынан Мирас Жақыпов (52 келі), Самат Бәшенов (60 келі), Мейірім Нұрсұлтанов (69 келі), Данабек Сужанов (81 келі) және Руслан Мырсатаев (+91 келі) жұдырықтасады. Сонымен қатар, қосымша жекпе-жекке қажет болған жағдайда Ілияс Сүлейменов шығады.