WSB. Мардан Берікбаев «арландарға» алғашқы жеңісті сыйлады

Бүгін,1 ақпан күні Дүниежүзілік бокс сериясы бәсекелерінің аясында «Астана арландары» кәсіпқой бокс клубы Ресейдің «Russian Boxing Team» командасымен жекпе-жек өткізуде. Бұл кездесу Алматының Балуан Шолақ атындағы Спорт сарайында өтуде. 49 келі салмақта ресейлік Белик Галановпен Мардан Берікбаев жұдырықтасты. Бұған дейін хабарлағанымыздай, бұл салмақта «Астана арландарының» намысын Азамат Исақұлов қорғауы керек болатын. Алайда, бапкерлер кеңесе келе, Исақұловты Берікбаевқа алмастыруды жөн деп тауыпты. Мардан Берікбаев бұл маусымда өткізген екі жекпе-жекті жеңіспен аяқтады. Ал Белик Галанов - Ресейдің үш дүркін чемпионы. Қос боксшы алғашқы раундта бір-бірін бақылап шықты. Ал екінші раундта Мардан Берікбаев қарсыласына бірнеше соққысын дарытты. Келесі кезеңдерде де басымдықты уыстан шығармаған қазақстандық боксшы жеңіске жетіп, «арландарды» алға шығарды.