Геннадий Головкин ганалық Осуману Адаманы техникалық нокаутпен жеңді

Әлемнің бокс сүйер қауымы бүгін назарын Монте-Карлоға тікті. Бұл күні Салле де Этоиле аренасында кәсіпқой бокс кешінің ең басты жекпе-жегінде WBO және IBO тұжырымы бойынша Әлем чемпионы, қазақстандық Геннадий Головкин чемпиондық атағын қорғады. Оған ганалық боксшы Осуману Адама қарсылас болды. Спорт сарапшылары бұл жекпе-жектегі сөзсіз фаворит - Головкин деп болжаған еді. Қателеспепті. Қазақстандық боксшы ганалық жігітті аса қиналмай ұтты. «1 ақпан - Головкин тұңғыш рет жеңілетін күн» деген Осуману Адама сөзінде тұра алмады. Головкинге бар болғаны 7 раунд қана төтеп бере алды. Адаманы 1-ші және 6-шы раундтарда нокдаунға жіберген Геннадий 7-ші раундта да бірнеше ауыр соққысын дарытқан соң, төреші жекпе-жекті тоқтатуды жөн санады. Сонымен, Головкин өзінің чемпиондық атақтарын қорғап қалды. Бұл - оның 29-шы жекпе-жегі. Ол барлық кездесуде жеңіске жетіп, 25 жекпе-жекті мерзімінен бұрын аяқтаған. Ганалық боксшы шаршы алаңда осымен 26 жекпе-жек өткізді. Бүгінгісін қосқанда төртінші рет жеңілістің дәмін татып отыр. Г. Головкиннің келесі кездесуі осы жылдың 26 сәуірінде өтеді деп белгіленді. Әзірше қарсыласының кім болатыны анықталған жоқ.