WSB. Жәнібек Әжібай есе жіберді

Алматыдағы Балуан Шолақ атындағы спорт сарайында Дүниежүзілік бокс сериясы аясындағы Қазақстан-Мексика командаларының бәсекесі жалғасуда.

64 келі салмақта шаршы алаңғы Маңғыстау бокс мектебінің түлегі – Жәнібек Әжібай көтерілді. Ол - 2012 жылы Шоқыр Бөлтекұлы атындағы халықаралық турнирде топ жарды. Сол жылы Маңғыстау облысы құрамасында жұдырықтасып, Қазақстан Кубогының иегері атанған. Сонымен қатар, ел чемпионатында қола жүлдені қанжығасына байлады. Ал биыл Бакуде өткен «Ұлы Жібек жолы» халықаралық турнирінде күміс алқа тақты.

«Astana Arlans» құрамына қабылданған боксшы Алматы төрінде Дүниежүзілік бокс сериясындағы алғашқы жекпе-жегін өткізді. Оның қарсыласы - Кристиан Биела болды. Жәнібек Әжібай мексикалыққа сәл ғана ұпай айырмашылығымен есе жіберді. Жалпыкомандалық есеп - 2:1. «Astana Arlans» алда.