Ноттингем турнирінде Зарина Диас ширек финалға шықты

Ноттингемде өтіп жатқан ITF сериясындағы теннис турнирінде қазақстандық Зарина Диас ширек финалға жолдама алды. Ол екінші айналымда Ұлыбритания спортшысы Наоми Броудиден 7:5, 3:6, 6:2 есебімен басым түсті. Айта кетейік, Зарина Диас әлемнің 86-шы ракеткасы болса, қарсыласы 163-ші орында. Бұл жеңістен кейін қазақстандық теннисші жалпы есепті теңестірді. 1:1. Зарина Диас жартылай финалға шығу үшін америкалық Мелани Оудинді жеңуі керек. Ол әлемдік рейтингте 161-ші сатыда тұр. Оудин екінші айналымда жапон қызы Аюми Моританы 6:1, 6:3 есебімен ұтты. Естеріңізге сала кетейік, бірінші айналымда Зарина Диас австралиялық теннисші Оливия Роговсканы 6:2, 3:6, 6:0 есебімен жеңген еді. Ноттингем турнирінің жалпы жүлде қоры – 75 мың АҚШ доллары.