Қазақстан әртістік жүзуден Әлем кубогы кезеңінде тағы үш жүлде еншіледі

Қытайдың Сиань қаласында өтіп жатқан әртістік жүзуден Әлем кубогының кезеңінде Қазақстан құрамасы тағы үш медальға қол жеткізді.

Турнирде Виктор Друзин еркін бағдарламада үшінші нәтиже көрсетіп, қола жүлде иеленді. Осылайша, ол жарыстағы екінші медалін алды. Бұған дейін спортшы техникалық бағдарламада да үздік үштіктен көрінген еді.

Алдияр Рамазанов пен Ясмина Исламова техникалық бағдарламада сәтті өнер көрсетіп, күміс жүлдеге қол жеткізді. Қазақстандық жұп жарысты екінші орынмен аяқтады.

Сондай-ақ, осы бағдарламада Айғаным Саим мен Артур Майданов қола медаль жеңіп алды. Осы нәтижеден кейін Қазақстан құрамасының қоржынында төрт жүлде бар.

Әлем кубогының кезеңі 3 мамырда мәресіне жетеді.