Биатлоннан 2026 жылғы Олимпиадаға қатысатын ұлттық құрама тізімі белгілі болды

Қазақстан биатлоншылар одағы жаттықтырушылар штабымен бірлесіп, алдағы Италияда өтетін қысқы Олимпиада ойындарында ел намысын қорғайтын спортшылардың тізімін ресми түрде бекітті.

Жаттықтырушылар кеңесінің шешімімен Владислав Киреев, Әсет Дүйсенов, Милана Генева және Айша Ракишева Олимпиадада Қазақстан атынан сынға түсетін болды.

Қазіргі таңда құрама Чехияда оқу-жаттығу жиынына қатысуда және Әлем кубогының кезекті кезеңінде бақ сынайды. Бұл турнир Олимпиадаға дайындықтың соңғы кезеңі болмақ. Одан кейін олимпиадалық құрама Италияға оқу-жаттығу жиынына аттанады.

2026 жылғы Олимпиада ойындарында биатлон жарыстары 8 ақпанда басталады.