«Барыс» жаңа маусымдағы алғашқы жолдастық кездесуінде жеңіске жетті

Астаналық «Барыс» хоккей клубы швейцариялық «Давос» клубымен жолдастық кездесу өткізіп, 4:3 есебімен басым түсті. Бұл елордалық ұжымның жаңа бапкері Андрей Назаровтың алғашқы ойыны болды. Кездесу Швейцарияның Давос қаласында өтті. Алғашқы кезеңде айдын иелері есеп ашып, алға шыққан болса, екінші кезеңде «Барыс» клубының қорғаушысы Роман Савченко есепті теңестірді. Ал, қалған шайбаның барлығы үшінші кезеңнің соңғы 10 минутында соғылды. «Барыс» пен «Давос» клубтары арасындағы екінші жолдастық кездесу 3-ші тамыз күні Сурси қаласында өтеді. Ойын Астана уақытымен кешкі сағат 20:00-де басталады. Естеріңізге сала кетейік, «Барыс» хоккей клубы Құрлықтық хоккей лигасындағы алғашқы кездесуін Астанада уфалық «Салават Юлаев» клубымен өткізеді.