«Барыс» өз айдынында ұтылды

«Барыс» құрлықтық хоккей лигасы аясындағы кезекті ойынын «Лев» хоккейшілерімен өткізіп, 2:3 есебімен жеңіліп қалды. Прагадан келген қонақтар есепті 10-шы минутта ашты. Мартин Тернберг мергендігімен көзге түсті. Дегенмен, үзіліске 3 минут қалғанда айдын иелері таразы басын теңестірді. Шайбаның авторы - Брэндон Боченски.

Екінші 20 минуттықтың басында Якуб Матай қонақтарды тағы да алға шығарды.  «Барыс» есепті үшінші кезеңде теңестірді. 46-шы минутта Роман Старченко Константин Руденконың пасын ұтымды пайдаланып, «Левтың» қақпасынан саңылау тапты. Алайда, Астаналық жанкүйерлердің қуанышы көпке созылмады. Араға бір минут салып Иржи Секач командасына жеңіс әкелді.