Біржан Жақыпов жартылай финалға өте алмады

Қазақстандық боксшы Біржан Жақыпов Рио-де-Жанейродағы Олимпиада ойындарын аяқтады. Жарыстың ширек финалында ол өзбекстандық Хасанбой Дусматовтан 3:0 есебімен жеңілді. Бірінші раундта қарсыластар бір-біріне қауіпті шабуылдар жасағанымен, жекпе-жектің алғашқы 3 минуты азғантай басымдықпен өзбек спортшысының пайдасына шешілді. Екінші раунд та Дусматовтың еншісіне жазылды. Кездесудің соңғы раундында Жақыпов белсенділік танытып, жеңісті жұлып әкетуге тырысқанымен, бұл жолы да қарсылас басым түсті. Риодағы Жазғы ойындар - 32 жастағы Жақыповтың спорттық мансабындағы үшінші Олимпиадасы. Үш Олимпиада да ол ширек финалдан ары аса алмаған. Айта кетсек, бүгін шаршы алаңға тағы бір қазақстандық боксшы Василий Левит (91 келі) шығады. ¼ финалы аясындағы кездесу Астана уақытымен сағат 4:30-да басталады.