Маргарита Елисеева ауыр атлетика бойынша 5-орынға тұрақтады (ВИДЕО)

Рио-де-Жанейрода өтіп жатқан Олимпиада ойындарында ауыр атлетикадан қазақстандық спортшы Маргарита Елисеева бақ сынады. «А» тобында 48 келіге дейінгі салмақ санатында жарысқа шыққан зілтеміршіміз жұлқа көтеруде үш мүмкіндіктің тек біреуін ғана еңсерді. Осылайша, алғашқы жаттығуда отандасымыз 80 келімен шектелді. Алдымен 80 келіге тапсырыс берген Маргарита оны оңай көтерді. Алайда, соңғы 2 сында 84 келіге тапсырыс берген ол зілтемірді ырқына көндіре алмады. Ал, серпе көтеруде 24 жастағы зілтеміршіміз бірінші мүмкіндікте 103 келі салмақты бағындырды. Екінші мүмкіндікте 106 келі салмақты қазақстандық спортшы көтере алмағанымен, соңғы мүмкіндікте зілтемір оның ырқына көнді. Осылайша, екі сайыстың қорытындысы бойынша Маргарита 186 келі (80+106) салмақты бағындырып, 5-орынға тұрақтады.