Әлем чемпионаты – 2015. Азамат Мұқанов жарыстан шығып қалды

Дзюдодан Әлем чемпионатының екінші күнінде ерлер (66 келі) мен қыздар (52 келі) сынға түсуде. Кеше палуандарымыз үшін сәтті күн болды. 60 келідегі Елдос Сметов Әлем чемпионы атанса, осы салмақтағы тағы бір қазақстандық спортшы Рустам Ыбраев чемпионаттың күміс жүлдегері атанды. Өкінішке қарай, қыздарымыз жүлделі орынға іліге алмады. Чемпионаттың екінші күні жерлестеріміз үшін сәтсіз басталды. Дзюдодан Ұлттық құраманың капитаны 66 келідегі Азамат Мұқановты төрешілер франциялық спортшыға ережеге сай емес әдіс қолданды деп жарыстан шеттеті. Енді 66 келіде ел намысын Елдос Жұмаханов қорғайтын болады. Сонымен қатар, қыздар арасында 52 келіде Ленария Мингазова мен Олеся Куценко қатысуда. Айта кетейік, дзюдодан Әлем чемпионатын «Қазақстан» Ұлттық телеарнасымен «KAZsport» арнасынан тікелей эфирде тамашалай аласыз.