WSB финалы. Мейірім Нұрсұлтанов кубалық Арлен Лопесті ұтып, есепті 3:1-ге жеткізді

Астанада WSB (Бүкіләлемдік бокс сериясы) 5-ші маусымының «Astana-Arlans» пен «Cuba Domadores» арасындағы финал өтуде. «Дәулет» спорт кешенінің шаршы алаңына төртінші болып 75 келіге дейін салмақ дәрежесіндегі боксшылар шықты. «Astana-Arlans» командасының мүшесі Мейірім Нұрсұлтанов кубалық Арлен Лопеспен жұдырықтасып, 3:0 (48:47, 48:47, 48:47,) есебімен ұтты. Осылайша «Astana-Arlans» командасы финалдық серияда есепті 3:1-ге жеткізіп, алға шықты. Айта кетейік, алғашқы жұпта қазақстандық Теміртас Жүсіпов кубалық Йоанис Оскар Аргилагості 3:0 (50:45, 50:45, 50:45) есебімен ұтты. Екінші кездесуде Қайрат Ерәлиев кубалық 2012 жылғы Лондон Олимпиадасының чемпионы Робейси Рамиреске есе жіберді. Ал, «Astana-Arlans» командасының капитаны Самат Бәшенов кубалық Ясниер Толедоны жеңді.