Екі дзюдошымыз үздік ондықта

Қазақстандық дзюдошы Максим Раков 100 келі салмақ бойынша әлем рейтингінде 6-шы орынға тұрақтады. Раковтан бөлек, үздік ондыққа 60 келідегі Елдос Сметов енді. Елдос 9-шы орынға жайғасқан. 2013 жылғы Әлем чемпионатының күміс жүлдегері 66 келідегі Азамат Мұқанов 15-ші орында. Сондай-ақ, бұл салмақтағы Елдос Жұмаханов 27-ші орында болса, Сергей Лим 32-ші орыннан көрінді. Қыздар арасындағы рейтингте 78 келіден жоғары салмақта Гүлжан Исанованың әлемдік рейтингтегі орны – 13. Жақында Моңғолияда аяқталған Гран-приден қола жүлдеге ие болған 63 келідегі Мариан Ордабаева 35-ші орынға тұрақтады. 48 келіге дейінгі салмақтағы Александра Подрядова 33-ші орында болса, 70 келіге дейінгі салмақтағы Альбина Амангелдиева 27-ші орында.