«Жетісу» волейболшылары Қазақстан Кубогын жеңіп алды

Павлодарда волейболдан әйелдер арасында өткен Қазақстан Кубогында талдықорғандық «Жетісу» командасы жеңімпаз атанды.

Жүлдеге бірнеше команда таласып, ақырында «Ертіс-Қазхром» шешуші сында  астаналық волейболшыларға жол беріп қойып, үшінші орынды місе тұтса,  «Астана» екінші орынды иеленді. Ал, кубокты жетісулық арулар иемденді, деп хабарлайды sk-sport.kz.

«Біз өте қуаныштымыз. Біз бұл Кубокты қатты жеңіп алғымыз келді және кезекті рет өзіміздің көшбасшы екенімізді көрсеттік. Чемпионат бұрынғыдан да қызықты өтті, бұған кешегі өткен  «Ертіс-Қазхром» мен «Астана» кездесуі дәлел, ойын нәтижесі бұлай болады деп ешкім ойламаса керек, дегенмен қыздар үшін қуаныштымыз. Павлодар мен Астана волейболшылары чемпионатта әлі талай бәсекелестік көрсетеді», - дейді команда капитаны Татьяна Пюрова.

Еске сала кетейік, биыл  талдықорғандық волейболшылар алтыншы рет Қазақстан чемпионы атағын иеленген болатын.