«Alash Pride» жігіттері жеңіске жетті

Алматыда Балуан Шолақ атындағы спорт сарайында өткен «Ұлы Майдан ІІ» турниріндегі «Alash Pride» пен әлем құрамасы арасындағы қарымта жекпе-жектер аяқталды.   

Алғашқы жекпе-жекте «Alash Pride» өкілі Игорь Свирид дағыстандық Рашид Алиевті бірінші раундта нокаутқа жіберді. Ал қазақстандық команданың тағы бір өкілі Христас Муратиди тәжікстандық Лоик Раджабовтан жеңіліп қалды.

Үшінші жекпе-жекте Сиррожиддин Эшанбаев Сайд-Хамзат Авхадовқа есе жіберді. Таразы басын Әділ Боранбаев теңестірді. Ол үш раундқа созылған жекпе-жекте Данияр Бабақұловтан басым түсті.

Чемпиондық атаққа таласқан Асулан Тоқтарбаев АҚШ өкілі Кевин Крумнан ұтылды. Жекпе-жек кешінде Ақтілек Жұмабекұлы де жеңіске жете алмады.  Ал «Alash Pride»  намысын қорғаған қырғыз спортшысы Кылычбек Саркабев командаға жеңіс алып келді.

Аралас жекпе-жектен еліміздегі танымал файтер Ержан Естанов Аслан Шаовпен төбелесті. Төрешілердің шешімімен жеңіс қазақстандық спортшыға берілді.

Келесі жекпе-жекте Арман Оспанов ресейлік Евгений Леничевті нокаутқа жіберсе, Азамат Баходурзода  Лом Али Медиевтің тұншықтыру әдісіне түсіп қалды.

Соңғы жекпе-жекте «Қазақ» деген лақап аты бар Қайрат Ахметов Жапония өкілі Ватанабе Татсуяны ұтып, Азия чемпионы атағына ие болды.

Бұл кездесуде «Alash Pride» 7:5 есебімен жеңіске жетті.