Олимпиада-2016. Тамыздың 21-і күні өткен жарыстардың қорытындысы

Бразилияның Рио-де-Жанейро қаласында өтіп жатқан жазғы XXXI Олимпиада ойындарының соңғы күні қазақстандық спортшылар 2 түрлі спорт түрінен жарысқа қатысты. Қазақстан атынан еркін күрес бойынша 97 келі салмақта өнер көрсеткен Мамед Ибрагимов 1/8 финалда венесуэлалық Хосе Даниель Диас Роберттиді жеңіп, ширек финалда грузиялық Элизбар Одикадзеден жеңілді. Осылайша, ол Олимпиададағы жарысын тоқтатты. Ал, жеңілатлет Михаил Красилов марафонға қатысқан 155 спортшының арасында 101-ші болып келді. Айта кетейік, қазақстандық спортшылар осымен Рио-де-Жанейрода өтіп жатқан жазғы Олимпиада ойындарындағы жарыстарын аяқтады. Қазақстан қоржынында барлығы 17 медаль бар. Медальдар саны бойынша еліміз Олимпиадаға қатысушы мемлекеттер арасында 21-ші орынға тұрақтады. Айта кетейік, Қазақстан Рио Олимпиадасында ел тәуелсіздігін алғалы медальдар саны жағынан ең үздік көрсеткішке қол жеткізді.