Шығыс Қазақстанда қазақша күрестен «Еуразия барысына» іріктеу турнирі басталды

Шығыс Қазақстан облысы, Қарауыл ауылында қазақша күрестен республикалық кубогы басталды. Турнир еліміздің еңбек сіңірген жаттықтырушысы Манарбек Таутановтың құрметіне өткізіліп жатыр, деп хабарлайды ҚазАқпарат. Дүбірлі додаға Қазақстанның түкпір-түкпірінен ондаған палуан жиналған. Олардың ішінде Әлем, Еуропа және республика чемпиондары бар. Жарыс үш күнге созылмақ. Топ жарып шыққан жеңімпаз жаңа көліктің кілтін иеленеді. Ал, үздік шыққан бірнеше спортшы күзде Тараз қаласында өтетін «Еуразия барысы» турниріне жолдама алады. «Бұл сайыста әр облыстың мықты-мықты деген палуандары өзара бақ сынасады. Өңіріміздің намысын 2013 жылғы «Қазақстан Барысы» Айбек Нұғымаров және басқа да Азия чемпиондары қорғамақ», - деді ҚР еңбек сіңірген жаттықтырушысы Серік Қоржыкенов.