Данияр Елеусінов кәсіпқой бокстағы үшінші жеңісіне қол жеткізді

Олимпиада чемпионы Данияр Елеусінов венгр боксшысы Габор Горбичті төрешілердің бір ауыздан шығарған шешімімен жеңді. 

Жартылай орта салмақтағы кездесу Кардиффтегі бокс кешінде өтті. Жекпе-жек алты раундтан тұрды. Боксшылар берілген барлық уақытта жұдырықтасты. Барлық раундта да Елеусінов басымдылыққа ие болып, соңында 60-54 ұпаймен жеңіске жетті. 

Айта кетейік, Елеусінов бесінші раундта оң жақ көзінен жарақат алды, алайда бұл оған жеңіске жетуге кедергі болмады. 

Данияр Елеусінов кәсіпқой бокстағы бірінші кездесуін 28 сәуір күні өткізді. Нью-Йоркте өткен бокс кешінде америкалық боксшы Ноа Кидті 3 раундта техникалық нокаутпен ұтты. 7 маусымда Лондонда Золтан Шабоны ұпай айырмасымен жеңді.