Қазақстандық теннисшілер «Президент Кубогы-2016» турнирінің ширек финалына өтті

Қазақстандық Александра Гринчишина мен Гозаль Айнитдинова «Президент Кубогы-2016» халықаралық турнирінің ширек финалына өтті. Александра Гринчишина қарсыласы турнирдің екінші ракеткасы ресейлік Алена Тарасованы 6:4, 4:6, 6:1 есебімен жеңген болатын. Қазақстандық спортшы ширек финалда ресейлік Валерия Савиных немесе Ольга Дорошинамен ойнайды. Александра Гринчишина: «Мен бүгін жеңіске жеткеніме қуаныштымын, себебі барлығы - лайықты қарсыластар. Әрбір ойынға жете дайындаламын. Турнирлік кесте бойынша арықарай өте алам деген үміттемін». Екінші айналымдағы ойында Гозаль Айнитдинова ресейлік Ольга Пучковадан 6:4, 6:4 есебімен басым түсті. Гозаль ширек финалда Полина Монова (Ресей) - Анжелика Исаева (Ресей) жұбының жеңімпазымен кездеседі. Айта кетейік, «Kazsport» телеарнасы «Президент Кубогы-2016» турнирінің барлық ойындарын тікелей эфирде көрсетеді.