IV Алматы Марафонының рекорды жаңартылды

Биылғы Алматы Марафонына әлемнің 40 елінен 19 мың қатысушы шыққан. Айта кетейік, 2012 жылы ұйымдастырылған алғашқы Марафонға 2600 адам қатысқан еді. Бұл осындай ауқымдағы Орталық Азияда өткен алғашқы марафон. Ал, қашықтығы 42 шақырым 195 метр болған IV Алматы Марафонын ерлер арасында Шығыс Қазақстан облысының Риддер қаласынан келген 28 жастағы спорт шебері Адрей Лейменов жеңіп алды. Ол бұл марафонды 2 сағат 35 минут 51 секундта жүгіріп өткен. Өткен жылғы чемпион Алмат Имашев (02:36:21) биыл үшінші нәтиже көрсетті - 02:54:20. Екінші орында Георгий Шейко. Оның көрсеткіші - 02:37:50. «Бұл менің өмірімдегі екінші марафон. Бірінші рет өткен жылы Мәскеу Марафонына қатысқан едім. Жалпы, кез келген марафон адам ағзасына үлкен сын. Ал бұл жерде Алматы Марафонының орны ерекше. Ол өте күрделі марафондардың бірі. Сондықтан бұл бәсекеге Ыстықкөлде бір айдан аса уақыт тыңғылықты дайындалдым», - деді жеңімпаз. Ал, әйелдер арасында супер марафоннан бірініші орынды өткен жылғы жеңімпаз Гүлжанат Жанатбек жеңіп алды. Оның көрсеткіші: 02:52:18.