Виктория Графеева Бразилиядағы Әлем кубогының чемпионы атанды

60 келіге дейінгі салмақ дәрежесінің финалында отандасымыз жергілікті боксшы Ребека Сантоспен кездесті.

Бірінші раундта төрешілер басымдықты қазақстандық спортшыға берді (3:2). Екінші кезеңде бразилиялық боксшы алға шыққанымен (2:3), шешуші үшінші раундта жерлесіміз басым түсіп, 4:1 есебімен жеңіске жетті. Осылайша, ұлттық құрама өкілі турнирдің алтын медалін иеленді.

Бұл спортшылардың өзара төртінші кездесуі. Осыған дейін отандасымыз Астанада өткен жарыста жеңіске жетсе, кейін Ливерпульдегі ӘЧ-2025 және 2026 жылғы «кіші» әлем чемпионатында қарсыласына есе жіберген болатын. Бұл жолғы жеңіс қазақстандық былғары қолғап шеберіне өзара текетіресте есепті теңестіруге мүмкіндік берді.