Александр Шевченко спорттық мансабында алғаш рет «US Open» турнирінің екінші айналымында ойнайды

Қазақстанның екінші ракеткасы Александр Шевченко (#61) неміс теннисшісі Доминик Кёпфермен (#83) 2 сағат 56 минутқа созылған ойында 3:1 (6:4, 7:5, 5:7, 6:2) есебімен жеңіп, жарыстың екінші айналымына шықты. Шевченконың келесі қарсыласы АҚШ теннисшісі Фрэнсис Тиафо (#20).

Қазақстанның бірінші ракеткасы Александр Бублик (#27) алғашқы айналымда қытайлық Шан Цзюньшеннен (#72) 2:3 (4:6, 6:3, 7:5, 3:6, 4:6) есебімен жеңіліп, жарыс жолын аяқтады.

Бүгін әйелдер арасындағы бәсекеде Елена Рыбакина (#4) мен Юлия Путинцева (#32) және турнирге іріктеу кезеңі арқылы жолдама алған Тимофей Скатов «Үлкен Дулыға» турниріндегі алғашқы кездесулерін өткізеді.